Gjatë takimit me kryeministrin, Emil Dimitriev, eurokomisari Johanes Han theksoi rëndësinë e respektimit të sovranitetit në vendosjen për çështjet me karakter shtetëror dhe kombëtar.

“Eurokomisari Han theksoi se Bashkimi Evropian e respekton integritetin e vendit tonë dhe ardhmërinë tonë evropiane. Bashkëbiseduesit theksuan se është me rëndësi të respektohet sovraniteti në vendosjen për çështjet me karakter shtetëror dhe kombëtar”, njoftojnë nga kabineti i kryeministrit.

Dimitriev dhe Han i kanë përshëndetur zgjedhjet e zbatuara parlamentare duke i vlerësuar si korrekte, të besueshme dhe demokratike dhe kanë prezantuar mendimet dhe pikëpamjet e tyre për aspekte të ndryshme të situatës aktuale politike. Gjatë takimit është diskutuar edhe për rëndësinë dhe nevojën nga anëtarësimi i Republikës së Maqedonisë në Bashkimin Evropian dhe kanë dhënë vlerësim pozitive për marrëdhëniet e ndërsjella, si dhe reformat të cilat nevojiten për avancimin e standardeve në të gjitha sferat shoqërore dhe është shprehur gatishmëri drejt vazhdimit të bashkëpunimit në zbatimin e tyre.

“Deklaratat dhe veprimet e disa politikanëve nga vendet fqinje që shkaktojnë ndjenja negative tek qytetarët e Republikës së Maqedonisë nuk janë në funksion të përparimit të marrëdhënieve të mira fqinjësore. Vendi ynë do të vazhdojë me zbatimin e politikave që  nënkuptojnë bashkëpunim me të gjitha palët e interesuara në rajon në sfera të cilat janë me interes të përbashkët – ka deklaruar kryeministri Emil Dimitriev.

Në margjinat e Takimit ministror për Ballkanin Perëndimor, Han do të takohet me liderët e partive politike që janë të përfaqësuar në Kuvendin e Maqedonisë.

Eurokomisari Han në orën 16.00 do takojë liderin e Lëvizjes BESA në selinë  e partisë së tij për t’i vazhduar më pas takimet në Kuvend në ora 16.15 me kreun e “Aleancës për Shqiptarët” Ziadin Sela, me ish kryetarin e PDSH-së, Menduh Thaçi,  Han do takohet në ora 17.15, ndërsa ,me kreun e BDI-së, Ali Ahmetin takimi është caktuar për në ora 17.30.

Han takimet do i vijojë me kreun e LSDM-së Zoran Zaev në orën 19.00. Ndërsa nga VMRO-DPMNE ende nuk kanë konfirmuar vendin dhe orën e takimit.